HARAGIRIMANA Dieudonne
Iyzo Pro yahuje imbaraga na Producer Dominic Goodman usanzwe ukorera umuziki abahanzi biganjemo Abanyarwanda batuye muri Leta Zunze Ubumwe za Amerika mu rwego rwo gufasha abajyaga bagorwa no kubona uko bakora ibihangano byabo neza.
Iyzo Pro avuga ko ubusanzwe usanga abahanzi batuye muri Leta Zunze Ubumwe za Amerika bagorwa no kubona aho bakorera indirimbo bisanzuye ndetse banakenera ubufasha bwa bagenzi babo bo mu Rwanda bakagorwa no kwishyura studio ebyiri (iyo muri Amerika ndetse n’iyo mu Rwanda).
Ibi nibyo byatumye Iyzo Pro wari usanganywe studio ’Wave records’ ahuza imbaraga na Producer Dominic Goodman wari usanganywe ‘Versatile records’.
Nyuma yo guhuza izi studio zombi zikaba ’VR Records’ bagiye gushinga ishami mu Rwanda ryunganira iryo muri Leta Zunze Ubumwe za Amerika, muri Leta ya North Dakota.
Iyzo Pro yagize ati “Wasangaga inshuro nyinshi hari amaganya y’abahanzi bagorwa no gukorera umuziki muri Amerika kandi dufiteyo umubare munini w’abawukorerayo. Yewe n’aba hano usanga bibagora gukorana n’abatuye hariya, icyo kibazo nicyo twifuzaga gukemura.”
Uyu mugabo avuga ko bifuje ko iyi studio yaba ikiraro mu gutunganya ibihangano bihuza abahanzi batuye mu Rwanda n’abatuye muri Leta Zunze Ubumwe za Amerika.
