U Rwanda rwitwaye neza rugera ku mukino wa nyuma mu mikino y’Isi y’abafite ubumuga bwo mu mutwe

Ikipe y’u Rwanda y’Abakobwa yageze ku mukino wa nyuma mu mikino y’igikombe cy’Isi cy’abafite Ubumuga bwo mu Mutwe “2023 Special Olympics World Summer Games” iri kubera mu Budage, nyuma yo gutsinda Bahrat yo mu Buhinde zari zanganyije ibitego 2-2 kuri penaliti 4-3.

U Rwanda rwitabiriye iyi mikino iri kubera i Berlin kuva tariki ya 17 kugeza ku ya 25 Kamena 2023, iyi kipe yabanje kunganya n’u Buhinde igitego 1-1, inganya n’u Budage igitego 1-1, itsindwa na Jamaica ibitego 4-3 mbere yo gutsinda Israël igitego 1-0 mu mukino wayihesheje kurenga itsinda.

Kuri uyu wa Gatatu, tariki ya 21 Kamena 2023, ni bwo yakinnye umukino wa ½, aribwo yatsinze Bahrat kuri penaliti 4-3 nyuma y’uko zombi zari zanganyije ibitego 2-2.

Ku mukino wa nyuma uteganyijwe ku wa Gatanu, tariki ya 23 Kamena 2023, u Rwanda ruzahura n’u Bubiligi bwatsinze Canada ibitego 2-0 muri ½. Uyu mukino ukinwa n’abantu 7 mu kibuga ndetse  n’abasimbura 3.