Kubwayo Mc croix
Ikipe y’Igihugu y’u Rwanda ya Basketball yabonye intsinzi yayo ya mbere mu mikino yo gushaka itike y’Igikombe cya Afurika cya 2025, itsinda Gabon amanota 90-63 mu mukino wabereye muri Sénégal. U Rwanda rwari rusabwa gutsinda uyu mukino kugira ngo rwirinde gusoreza ku mwanya wa nyuma mu Itsinda C.
Umukino watangiye u Rwanda rutsinda agace ka mbere ku manota 28-21, rukomeza gukina neza no mu gace ka kabiri, Shema Osborn na Furaha Cadeau de Dieu bafasha ikipe kugwiza amanota. U Rwanda rwarangije igice cya mbere ruyoboye ku manota 50-34. Nubwo Gabon yagerageje kwitwara neza mu gace ka gatatu ibifashijwemo na Warene Moumbeki na Meyet Aworet, ntibyabujije u Rwanda gukomeza kuyobora ku manota 65-49. Agace ka nyuma, Ndizeye Dieudonné na Antino Jackson batsinze amanota menshi, umukino urangira u Rwanda rutsinze 90-63.
Mu wundi mukino w’iri tsinda, Sénégal yatsinze Cameroun amanota 87-83, isoza ku mwanya wa mbere n’amanota atandatu. Cameroun yasoje ifite amanota atanu, u Rwanda rufite ane, naho Gabon ya nyuma ifite amanota atatu.
Imikino ya kabiri y’amajonjora izakomeza hagati ya tariki ya 18-23 Gashyantare 2025, mu gihe Igikombe cya Afurika nyirizina kizabera muri Angola kuva tariki ya 12-24 Kanama 2025.
