Shakira nuburakari bwinshi yashinyaguriye Pique ashyira igishushanyo cy’umupfumu imbere yinzu ye aharebana n’inzu y’umubyeyi wa Pique -AMAFOTO

Umuhanzikazi Shakira yatangaje benshi nyuma yo gushyira igishushanyo cy’umupfumu imbere y’inzu ye, aharebana neza n’inzu ituyemo umubyeyi wa Gerard Pique baherutse gutandukana.

Ibya Shakira na Gerard Pique baherutse gutandukana bakaba bari kurebana ay’ingwe, ubu bikomeje gufata indi ntera. Nyuma yaho uyu muhanzikazi asohoreye indirimbo yibasira Pique n’umukunzi we mushya yamusimbuje, kuri ubu yakoze igikorwa gitangaje kuri Nyina wa Pique baturanye, benshi bavuga ko ari ubushotoranyi.

Nk’uko ibinyamakuru byinshi byabitangaje harimo na Daily Mail, byavuze ko Shakira yashyize igishushanyo cy’umupfumu imbere y’inzu ye aharebana neza n’inzu Nyina wa Pique atuyemo.

Mu mashusho akomeje gukwirakwira ku mbuga nkoranyambaga yafashwe n’abaturanyi be, agaragaza iki gishushanyo kirebana n’inzu ya Nyina wa Pique ndetse humvikana uyu muhanzikazi ari gucuranga cyane indirimbo aherutse gusohora yibasira Pique.

Uretse kuba Shakira yashyize igishushanyo cy’umupfumu aharebana no kwa Nyina wa Pique, yanacuranze indirimbo aherutse gusohora yibasira Pique n’umukunzi we mushya

Daily Mail yatangaje ko ibi byatangaje benshi ndetse bamwe bavuga ko ibi Shakira yakoze bisa nko gushotora umubyeyi wa Pique, mu gihe abandi bavuga ko akabije kwibasira umuryango wa Pique. Abandi nabo bavuze ko uyu muhanzikazi akwiriye kwakira ibyabaye hagati ye na Pique ntabishyiremo Nyina kuko nta ruhare yabigizemo.