Rwanda: umusore w’imyaka 25 arashinjwa kwangiza imyanya y’ibanga y’umugore umubyaye akanamusambanya

Umusore w’imyaka 25 y’amavuko akurikiranweho gusambanya umugore w’imyaka 45 nyuma yo kwangiza imyanya ye y’ibanga.

Uyu musore akaba ari uwo mu Murenge wa Kigembe mu Karere ka Gisagara.

Uyu musore akaba ukurikiranywe n’Ubushinjacyaha ku Rwego Rwisumbuye rwa Huye, aho yamaze kuregerwa Urukiko Rwisumbuye rwa Huye, kuri uyu wa Kane tariki 27 Ukwakira 2022.

Ubushinjacyaha buvuga ko uyu musore yakoze iki cyaha tariki 18 Ukwakira 2022 ku gasusuruko ahagana saa tanu za mugitondo.

Uyu musore wakoreye iki cyaha mu Muduguru wa Murebe mu Kagari ka Rubona mu Murenge wa Kigembe mu Karere ka Gisagara, aregwa kuba yarasanze uyu mugore w’imyaka 45 mu ishyamba riherereye muri aka gace, ubundi akamufata ku ngufu.

Ubushinjacyaha buvuga ko mu ibazwa ry’uyu musore, yiyemereye ko yafashe ku ngufu uyu mugore umurusha imyaka 20, abanje kumukubita hasi ku mabuye, ubundi arangije afata imyanya ndangagitsina ye arayikurura.

Yavuze ko kwangiza imyanya ndangagitsina y’uyu mugore yafashe ku ngufu, yabitewe n’umujinya wo kuba uwo mugore yari yanze ko bakorana imibonano mpuzabitsina.

SRC: TV10