Rutahizamu w’ibihe byose mu Rwanda Gimmy Gatete yashimagije ikipe yamwubakiye izina

Rutahizamu Jimmy Gatete abikuye ku mutima, yafashe umwanya ashimira ikipe ya Mukura VS ayivuga imyato yibutsa abantu ko iyi kipe ariyo yamugize uwo ariwe uyu munsi.

Abinyujije ku rukuta rwe rwa Instagram yagize ati “Mukura Victory Sports yampaye amahirwe menshi kugira ngo ngere ku ntego zanjye, mu rugendo rw’umupira w’amaguru. Ni ikipe itaratinye gukinisha umwana w”imyaka 15, mu cyiciro cya shampiyona mu Rwanda. Mukura ni ikipe itangaje mu kuzamura abana bakiri bato.”

Jimmy Gatete yakiniye Mukura kuva 1995 mase 1997 atizwa muri Rayon Sports yaje no guhindura ibyangombwa birangira ivuze ko uyu mukinnyi ari uwayo, ahita ajyana n’ikipe muri CECAFA mu 1998.

Umwe mu mikino yagize Gatete Jimmy ikimenyabose muri Mukura, ni umukino wa gicuti Mukura cyakiriyemo KCCA, Mukura iyitsinda ibitego 5-1, harimo ibitego 3 bya Jimmy Gatete.