Rubavu: Abanyeshuri 2 bo mu kigo kimwe bapfuye impfu z’amayobera mu cyumweru kimwe gusa hakekwa ikibyihishe inyuma giteye ubwoba

Mu karere ka Rubavu mu murenge wa Nyamyumba, haravugwa impfu zidasanzwe z’abana babiri bigaga ku ishuri rimwe bapfuye mu cyumweru kimwe.

Bamwe mu baturage baravuga ko ari imyuka mibi yateye iki kigo cy’ishuri aba ba nyakwigendera bigagaho ibafata ndetse ikanabavugiramo ko ifite intego yo kwivugana abana 200.

Umwana w’imyaka 14 wigaga mu mwaka wa gatanu w’ishuri ribanza rya Buhanga riri muri aka Kagari, yitabye Imana mu buryo bw’amayobera, nyuma y’iminsi mike gusa mugenzi we biganaga nawe yari yaritabye Imana.

Abaturage bo muri ako gace batangarije RadioTv10 dukesha iyi nkuru ko, iyi myuka mibi yoherezwa n’abaturiye iryo shuri.

Bamwe mu banyeshuri bari baje gushyingura mugenzi wabo bavuga ko iyo myuka mibi bita ‘Ibitama’ ivugira muri abo bana ifata, ko izashyirwa ari uko yishe abana 200.

Umuyobozi w’iri shuri ribanza rya Buhanga, Nsabimana Andre we avuga ko nta mwana wigeze agirira ikibazo muri iki kigo bityo ko nta munyeshuri ukwiye kugira ubwoba kuko abarezi bahari ngo babafashe.