Kubwayo Mc croix
Ku wa Kabiri, tariki ya 5 Ugushyingo 2024, imikino ya UEFA Champions League yarakomeje. Ku kibuga cya Santiago Bernabeu, Real Madrid yakiriye AC Milan mu mukino wari witezwe n’abatari bake. Real Madrid yatangiye ishaka igitego hakiri kare, cyane cyane binyuze kuri Kylian Mbappé, ariko ku munota wa 12 AC Milan yafunguye amazamu ku gitego cyatsinzwe na Malick Thiaw akoresheje umutwe, ku mupira wavuye muri koruneri yatewe na Christian Pulisic.
Real Madrid yakomeje guhatana ishaka uko yakwishyura. Ku munota wa 23, Vinicius Junior yatsinze penaliti nyuma yo gukorerwaho ikosa na Emerson Royal. Gusa AC Milan yongeye guhagurutsa abafana bayo nyuma y’igitego cya kabiri ubwo Alvaro Morata yatsindaga, nyuma yo gucomekera ku mupira wari uvuye kuri Rafael Leao. Igice cya mbere cyarangiye AC Milan iyoboye n’ibitego 2-1.
Mu gice cya kabiri, Real Madrid yakoze impinduka mu bakinnyi, ariko ntibyabafashije kubonera intsinzi imbere y’abafana babo. Ku munota wa 73, AC Milan yongeye kubona igitego cya gatatu cyatsinzwe na Tijani Reinders ku mupira yahawe na Rafael Leao. Umukino warangiye AC Milan itsinze Real Madrid ibitego 3-1.
Muri indi mikino yabaye, Liverpool yatsinze Bayer Leverkusen ibitego 4-0, birimo bitatu bya Luis Diaz na Cody Gakpo. Sporting CP nayo yatsinze Manchester City ibitego 4-1, mu gihe PSV Eindhoven yatsinze Girona ibitego 4-0. Slovan Bratislava yatsinzwe na Dinamo Zagreb ibitego 4-1, AS Monaco itsinda Bologna igitego 1-0, Borussia Dortmund itsinda Sturm Graz igitego 1-0, Celtic yo muri Scotland itsinda RB Leipzig ibitego 3-1, naho Lille yanganyije na Juventus igitego 1-1.
Imikino irakomeza kuri uyu wa Gatatu, tariki ya 6 Ugushyingo, aho Club Brugge izakira Aston Villa, Shakhtar Donetsk yakire Young Boys, FC Bayern Munich yakire Benfica, ndetse na Crvena Zvezda yakire FC Barcelona. Amakipe nka Inter Milan izahura na Arsenal kuri San Siro, Paris Saint-Germain ikine na Atletico Madrid kuri Parc des Princes, naho VFB Stuttgart yakire Atlanta..
