Social Mula
Kiyovu Sports ni yo yabonye amafaranga menshi mu Irushanwa rya Made in Rwanda 2022 yegukanye nyuma yo gutsinda Rayon Sports ibitego 2-1 ku mukino wa nyuma.
Iri rushanwa ryari ryahuje amakipe ane akomeye, ryakinwe hagati ya tariki ya 7 n’iya 9 Ukwakira 2022.
Mu bihembo byatanzwe, Kiyovu Sports yegukanye igikombe yahawe miliyoni 5 Frw, Rayon Sports ya kabiri ihabwa miliyoni 4 Frw, Mukura VS ya gatatu ihabwa miliyoni 3 Frw mu gihe Musanze FC yabaye iya kane, yahawe miliyoni 2 Frw.
Uretse ibi bihembo, amakipe yagombaga kugabana amafaranga yavuye ku kibuga, ariko hakagira atwarwa na sosiyete icuruza amatike, FERWAFA itegura imikino n’aya stade ya Kigali yakiniweho imikino yose.
Nyuma yo guteranya amafaranga yabonetse mu mikino ya 1/2 n’iya nyuma, FERWAFA yatwaye miliyoni 1,31 Frw, URID icuruza amatike itwara miliyoni 2,047 Frw naho ba nyiri Stade ya Kigali batwara miliyoni 1,3 Frw.
Rayon Sports yahawe 30% ingana na miliyoni 4,43 Frw, Kiyovu Sports ihabwa 27% ingana na miliyoni 4,27 Frw naho Mukura VS na Musanze FC zihabwa miliyoni 3,02 Frw.
Muri rusange, amafaranga yose yagabanywe muri iri rushanwa ukuyemo ibihembo ni miliyoni 20,47 Frw habariwemo miliyoni 1 Frw (ibihumbi 500 Frw kuri buri imwe) yahawe Musanze FC na Mukura VS mu rwego rwo kuzorohereza ingendo.
