M.Ben
Rayon iramukize! Umuzamu wari warazonze Rayon Sports WFC agiye kugurwa za miliyoni ndetse na we ajye ahembwa mu mamiliyoni mu gihugu cy’aba-miliyoneri.
Umunyezamu wa AS Kigali y’Abagore, Ndakimana Angeline, agiye kwerekeza mu Ikipe ya Al Nors yo mu Cyiciro cya Mbere muri Arabie Soudite aho agiye gutangwaho miliyoni 22 Frw mu gihe cy’imyaka ibiri.
Ndakimana usigaje amezi atanu ku masezerano ye y’imyaka ibiri muri AS Kigali WFC, yabengutswe na Al Nors nyuma yo kwitwara neza mu Ikipe y’Abanyamujyi no guhamagarwa mu Ikipe y’Igihugu “Amavubi” mu bihe bitandukanye.
Amakuru yemeza ko Al Nors yavuganye n’ubuyobozi bwa AS Kigali ndetse bemeye no kugura amasezerano y’amezi atanu asigaye bakayatangaho ibihumbi 22$.
Nta gihindutse Ndakimana niyerekeza muri Arabie Saoudite azajya ahembwa miliyoni 1,5 Frw ku kwezi n’agahimbazamusyi k’ibihumbi 100 Frw ku mukino ikipe ye yatsinze, mu gihe azajya agenerwa icumbi, imodoka imujyana ku myitozo ndetse no kumugaburira.
