Kubwayo Mc croix
Umukino wa ½ mu gikombe cy’Intwari wahuje Rayon Sports na Police FC kuri uyu wa Kabiri, tariki ya 28 Mutarama 2025, wasize Police FC ikatishije itike yo kujya ku mukino wa nyuma nyuma yo gutsinda Rayon Sports kuri penaliti 4-2.
Umukino watangiye amakipe yombi akinana ishyaka rikomeye, aho igitego cya mbere cyabonetse ku munota wa 22 gitsinzwe na Iraguha Hadji wa Rayon Sports. Police FC yishyuye ku munota wa 48 binyuze kuri Issah Yakubu. Uko iminota yakomezaga kwicuma, amakipe yombi yakomeje kwataka ariko ntihagira ikindi gitego kiboneka, bituma umukino urangira ari 1-1.
Mu minota y’inyongera, Rayon Sports yagize igihombo gikomeye ubwo umuzamu wayo Khadime Ndiaye yahawe ikarita y’umutuku ku munota wa 77, asimburwa na Ndikuriyo Patience. Nyuma y’iminota 90 n’inyongera, amakipe yombi yahise ajya kuri penaliti kugira ngo hamenyekane itsinda.
Penaliti za Rayon Sports zakozweho cyane n’umuzamu wa Police FC Niyongira Patience, utigeze yorohera abakinnyi nka Aziz Bassane na Omar Gning. Ku rundi ruhande, abakinnyi ba Police FC nka Mugisha Didier na Ani Elijah bashyize umupira mu izamu neza, bihesha Police FC intsinzi ya 4-2.
Police FC izahura na APR FC ku mukino wa nyuma w’iki gikombe kizatangira ku wa Gatandatu, tariki 3 Gashyantare 2025.
