THIERRY Mugiraneza
Ikipe ya Rayon Sports yatsinzwe Police FC Ibitego bine kuri bibiri mu mukino w’umunsi wa 25 wa shampiyona y’ikiciro cya mbere mu Rwanda.
Kuva ku munsi wejo kuwa Gatanu, shampiyona mu Rwanda yari yasubukuwe ñyuma y’uko abakinnyi bari bavuye mu makipe y’ibihugu.
Uyu munsi kuwa Gatandatu, kuri sitade ya Muhanga . Rayon Sports yari yakiriye Police FC mu mukino w’umunsi wa 25.
Police FC niyo yatangiye Umukino neza kuko ku munota wa 19 gusa , Danny Usengimana yatsinze igitego cya mbere. Police iba itangiye kuyobora umukino.
Rayon Sports nayo ntiyigeze ituza itarishyura igitego maze ku munota wa 22 Paul Were atsinda igitego cyo kwishyura.
Ku munota wa 25 Police yatsinze igitego cya Kabiri , yatsinze kuri penaliti.
Umukino waranzwe no gutsinda bishyura , kuko ku munota wa 29 Mussa Essenu wa Rayon Sports yushyuriye iyo kipe biba bibaye 2-2.
Mbere y’uko igice cya mbere kirangira, ku munota wa 41 Rayon Sports yavunikishije umuzamu wayo Hakizimana Adolphe hinjiramo Amani.
Igice cya mbere kirangira impande zombi zinganyije ibitego bibiri kuri bibiri.
Mu gice cya kabiri , Police FC yaje gutsinda igitego cya gatatu iba iyoboye umukino ku bitego bitatu kuri bibiri. Iza no gutsinda icya Kane Umukino urangira ari bine bya Police FC kuri bibiri bya Rayon Sports.
