Kubwayo Mc croix
Pep Guardiola, umutoza w’imyaka 53 ukomoka muri Espagne, yongeye amasezerano muri Manchester City nyuma y’imyaka icyenda ayobora iyi kipe. Yageze muri City mu 2016, amaze gutwara ibikombe 18 birimo bitandatu bya Premier League. Amasezerano ye yari agomba kurangirana n’uyu mwaka w’imikino, ariko byemejwe ko azakomeza kuyobora iyi kipe.
Guardiola yavuze ko afite ibyiyumvo bidasanzwe kuri City: “Twanyuzemo ibihe bitangaje kandi mfite byose umutoza yakwifuza. Ubu intego ni ugutwara ibikombe byinshi kurushaho.”
Umuyobozi w’ikipe, Khaldoon Al Mubarak, yashimangiye ko Guardiola afite inyota yo gutsinda idashira: “Kugumana Pep ni amahirwe akomeye. Ubwitange bwe n’icyerekezo bishya azana bizakomeza guhindura umupira w’amaguru mu Bwongereza.”
Iki cyemezo cyafashwe mu gihe City ikiri mu iperereza ry’ishyirahamwe rya Premier League ku byaha 115 by’amabwiriza y’imari, ibyo ikipe ihakana.
