Kubwayo Mc croix
Umutoza wa Manchester City, Pep Guardiola, yatangaje ko ashobora kuba yarakoze ikosa mu mpeshyi ishize ubwo yasabaga ikipe kureka gahunda zo kugura abakinnyi bashya. Iyi myanzuro ye ngo ishobora kuba ari yo iri mu byatumye ikipe ye ititwara neza muri uyu mwaka w’imikino.
Manchester City iri kwitegura kwinjira mu isoko ry’igura n’igurisha muri uku kwezi kwa Mutarama mu rwego rwo gukumira kugwa kw’umusaruro w’ikipe. Kugeza ubu, iyi kipe ntiyari yarigeze igura umukinnyi ukomeye muri Mutarama kuva ubwo yaguze Aymeric Laporte mu mwaka wa 2018 agurwa miliyoni £57 avuye muri Athletic Bilbao.
Icyakora, biravugwa ko ubu Manchester City iri hafi kurangiza amasezerano yo kugura myugariro wa Lens, Abdukodir Khusanov, ukomoka muri Uzbekistan ku kayabo ka miliyoni £33.6. Guardiola kandi afite muri gahunda kugura rutahizamu wa Eintracht Frankfurt, Omar Marmoush, ndetse n’umwana ukiri muto ukina mu bwugarizi wa Palmeiras, Vitor Reis.
Ku rundi ruhande, Kyle Walker, myugariro w’inararibonye, yahawe uburenganzira bwo gushaka andi makipe hanze y’u Bwongereza.
Pep Guardiola yagize ati: “Mu mpeshyi ishize, ikipe yatekereje kugura abakinnyi ariko ndavuga nti ‘oya, ntituzagura.’ Nariringiraga aba basore cyane, natekerezaga ko dushobora kongera gutsinda. Ariko nyuma y’imvune nyinshi – mbega ukuntu twagombye kuba twaragize izindi ngamba.”
Guardiola avuga ko imvune nyinshi ari zo zatumye Manchester City ititwara neza, aho ubu iri ku mwanya wa gatandatu muri shampiyona ya Premier League, ikaba yarasezerewe mu gikombe cy’igihugu (EFL Cup), ndetse n’ibihe bibi mu irushanwa rya Champions League aho iri ku mwanya wa 22 muri 36.
Nk’uko Transfermarkt ibivuga, Manchester City yahuye n’imvune 15 z’abakinnyi bamaze nibura ibyumweru bibiri badakina. Muri zo, iyakomereye ikipe cyane ni iyatumye Rodri, wegukanye Ballon d’Or, atazongera gukina muri uyu mwaka wose. Myugariro John Stones na Ruben Dias na bo bazasiba umukino wa Brentford, naho ku bijyanye na Kyle Walker, Guardiola arasuzuma niba azamukoresha muri uwo mukino.
Yagize ati: “Twari tuzi ko dutangiye umwaka w’imikino dufite abakinnyi benshi barengeje imyaka 30. Twari tuzi ko hakwiye impinduka buhoro buhoro. Ariko mu mezi atandatu ashize, aba basore batsinze Premier League, inshuro ya kane yikurikiranya, bageze ku mukino wa nyuma wa FA Cup ndetse no muri ¼ cya Champions League. Sinari niteze ko twagira imvune zingana gutya.”
Ibi byose byatumye Manchester City yongera gutekereza ku kongeramo amaraso mashya kugira ngo ikomeze guhatana mu marushanwa akomeye.
