Kubwayo Mc croix
Patriots BBC yigaranzuye APR BBC mu mukino wa kane wa BetPawa Playoffs, amakipe yombi agiye guhatanira igikombe
Mu mukino wa kane wa kamarampaka, BetPawa Playoffs, Patriots BBC yongeye kwerekana imbaraga mu guhangana na APR BBC, itsinda ku manota 61 kuri 49.
Iyi ntsinzi yatumye amakipe yombi anganya imikino 2 kuri 2, bivuze ko hagitegerejwe indi mikino y’ingenzi kugira ngo hamenyekane ikipe izegukana igikombe.
Umukino watangiranye imbaraga, amakipe yombi anganya amanota mu gace ka mbere14 kuri 14.
Buri kipe yagaragaje ubushake bwo kwerekana ko itifuza gutsindwa, ari nako abafana bakomezaga gufana ku buryo bukomeye.
Patriots BBC yatangiye gutera intambwe, itsinda APR BBC ku manota 10 kuri 6. Ibi byahaye Patriots icyizere cyo gukomeza kuganza umukino, mu gihe APR BBC yari itangiye gucika intege mu bijyanye no kugumana umupira no gutsinda.
Yagerageje kugaruka mu mukino ariko Patriots BBC yabashije kuyirusha, itsinda amanota 24 kuri 20. Igice cya gatatu cyaranzwe no guhangana gukomeye ariko Patriots yagaragaje ko ishaka gutsinda uyu mukino.
Patriots BBC yakomeje kwihagararaho itsinda APR BBC ku manota 13 kuri 9. Ibi byayihesheje intsinzi ikomeye ku mukino wa kane, aho yasoje umukino ifite amanota 61 kuri 49 ya APR BBC.
Nyuma yo kunganya imikino 2 kuri 2, amakipe yombi asigaje imikino ibiri. Ikipe izatsinda iyo mikino izahita yegukana igikombe. Ariko, mu gihe batsindana umukino umwe kuri umwe, bizasaba gukina umukino wa karindwi kugira ngo hamenyekane ikipe yegukana igikombe cya shampiyona ya Basketball uyu mwaka.
