Mucyo Patience
Umukinnyi mpuzamahanga w`umurundi Nizigiyimana Karim bakunze kwita Mackenzie, yatandukanye ndetse ashimirwa n`ikipe ya Gasogi United, nkuko byatangajwe ku mbuga nkoranyambaga z`iyi kipe kuri uyu wa kane tariki 20 Nyakanga 2023.
Kuri uyu wa kane ikipe ya Gasogi United yatangaje ibinyujije ku mbuga nkoranyambaga zayo ko yatandukanye na myugariro mpuzamahanga w`umurundi Nizigiyimana Karim bakunze kwita Mackenzie inatangaza ko yemerewe kujya gushaka indi kipe yakomerezamo urugendo rwe rwo gukina umupira w`amaguru nk`uwabigize umwuga.
Mackenzie umwaka ushize w`imikino yagowe no kubona umwanya uhoraho wo gukina mu bwugarizi bwa Gasogi United kuko yari ahanganiye umwanya n`umwana muto Hakim ku kugarira uciye ku ruhande rw`iburyo aho bita kuri 2 ndetse benshi bakavuga ko byaba biterwa no kuba Mackenzie yaba amaze gukura kuko amaze amaze imyaka irenga 15 akina umupira w`amaguru nk`uwabigize umwuga.
Nizigiyimana Karim Mackenzie yakiniye amakipe akomeye mu Burundi, mu Rwanda ndetse no hirya no hino muri Afurika nka Gor Mahia,Rayon Sport,Apr Fc ndetse n`ayandi makipe menshi.
Mackenzie yageze muri Gasogi United ubwo yari avuye mu ikipe ya Rayon sport mu umwaka w`imikino 2022-2023 none batandukanye adatanze umusaruro yaje yitezweho.
Twabibutsa ko Mackenzie asanzwe ari umikinnyi ukinira Intamba mu rugamba, aho amenyerewe ku mipira azamukana ku muvuduko, wo hejuru aciye iburyo aho asanzwe akina yugarira.
