Uwihirwe
Nyarugenge habereye impanuka iteye ubwoba aho umunyonzi wari utwaye gas agonze imashini ikora umuhanda.
Ahagana mu masaha ya saa kumi n’imwe z’umugoroba, mu Karere ka Nyarugenge umurenge wa Nyamirambo habereye impanuka iteye ubwoba.
Umunyonzi wari ari kumanuka mu muhanda wa Miduha – Mageragere urimo gukorwa, yagonze imashini ikora umuhanda ayikubitaho umutwe, igare rye ryangiritse bikomeye ndetse nawe ubwe arakomereka bikomeye.
Uyu munyonzi yamanutse n’umuvuduko mwinshi ahurirana n’imashini iri gukata, iri mu kazi kayo.
Imbangukira gutabara yatabaye byihutirwa, umurwayi ahabwa ubufasha bw’ibanze ubundi yerekezwa ku bitaro bya Nyarugenge, gusa umunyonzi yakomeretse bikabije ku buryo adahabwa amahirwe yo kuza kurokoka.
Polisi y’igihugu ikomeza kwibutsa abatwara ibinyabiziga kwirinda kugendera ku muvuduko uri hejuru kuko ushyira mu kaga ubuzima bwabo.
