Nyagatare: Umugabo yishe umugore we amukubise inyundo ahita atoroka aragenda asiga araze imitungo ye

Umugabo witwa Sekamana Tharcisse uzwi ku izina rya Elias w’imyaka 40 y’amavuko, wo mu karere ka Nyagatare, arakekwaho kwica umugore we amukubise inyundo mu mutwe, agahita ahunga ariko yasize urupapuro rw’irage ry’abana.

Ibi byabaye ku wa Gatandatu tariki ya 25 Werurwe 2023, ariko umurambo wa nyakwigendera uboneka ku cyumweru mu nzu yari atuyemo.

Umukuru w’Umudugudu wa Kimaramu, Mutimura Charles, avuga ko aya makuru bayamenye bahamagawe n’ukekwaho icyaha ku cyumweru saa yine z’amanywa.

Yagize ati “Mu by’ukuri ntituzi amasaha yamwiciye kuko yaduhamagaye ku cyumweru saa yine z’igitondo, atubwira ngo tujye iwe, aturangira n’imfunguzo aho ziri ngo hari ibintu biri mu nzu tubikuremo.

Tugezeyo abana batubwira ko ataharaye. Birashoboka ko yamwishe hakiri kare ahita akinga inzu arigendera.”

Bageze mu nzu ngo basanze umubiri wa nyakwigendera, Niyonsenga Fortuneé, urambitse hasi ugaragaza igikomere mu mutwe, bikekwa ko yakoresheje inyundo mu kumwambura ubuzima.