Ni uburyo bwiza bwo kwiyahura, ingaruka mbi zo kwicara no kuryama

Ubushakashatsi bwakozwe n’ikigo kitwa le Sax muri Ostraliya, bwerekanye ko kuryama amasaha 9 no kwicara amasaha arenze 7 ku munsi byongera ibyago byo gupfa umuntu akenyutse.

Ubu bushakashatsi bwakorewe ku bantu 230.000 bo mu gihugu cya Ostraliya, aho abashakashatsi bakurikiranye uburyo babaho, maze basanga kuryama no kwicara igihe kirekire bikenya ababikora.

Ikindi cyongera ibyago byo gupfa vuba, ni ukudakora imyitozo ngororamubiri kuri abo bantu. Ibyo byago bikaba byikuba inshuro 4 iyo hiyongereyeho kunywa inzoga n’itabi byinshi ndetse no kudasinzira bihagije ( munsi y’amasaha 7,5 mu ijoro).

Dogiteri Adrian Bauman, umwe mu bakoze ubu ushakashatsi, yatangaje ko abashinzwe inzego z’ubuzima bagomba kwita kuri ibi bitera abantu kurwara indwara zitandura, kugira ngo bashobore kurokora ubuzima bw’abantu benshi no kugabanya ingaruka ziterwa n’indwara zijyanye n’imibereho y’abantu, haba ku guhugu ndetse no ku miryango.