Kubwayo Mc croix
Ikipe ya Napoli yo mu Butaliyani yatangiye ibiganiro na Manchester United yo mu Bwongereza mu rwego rwo kugura Alejandro Garnacho, umukinnyi ukiri muto wagaragaje impano idasanzwe muri Premier League. Napoli irifuza uyu musore ukomoka muri Argentine kugira ngo azasimbure Khvicha Kvaratskhelia, witezwe kuba yerekeza muri Paris Saint-Germain (PSG).
Garnacho w’imyaka 20 amaze kwigaragaza cyane muri Manchester United. Mu mikino 29 yakiniye iyi kipe muri uyu mwaka, yatsinze ibitego umunani ndetse anatanga imipira ivamo ibitego bine, byatumye agira uruhare runini mu gutanga umusaruro ku ikipe ye.
Napoli yemeza ko Garnacho ari umukinnyi mwiza kandi ushobora kuziba icyuho cya Kvaratskhelia, bivugwa ko ashobora kugurishwa PSG ku mafaranga ari hagati ya miliyoni 70 na 80 z’amayero. Napoli irateganya gutanga agera kuri miliyoni 50 z’amayero kugira ngo yegukane Garnacho, nubwo Manchester United yamutangiye agaciro kari hejuru ya miliyoni 70 z’amayero.
Nubwo Manchester United itaratangaza niba yiteguye kurekura Garnacho, ibibazo by’amategeko agenga imari (Financial Fair Play) bishobora kuyibuza amahirwe yo gukomeza kumufata. Ibi byatuma iyi kipe yemera kumugurisha kugira ngo yubahirize ayo mategeko.
Napoli izwiho gushora imari mu bakinnyi bakiri bato bafite impano zidasanzwe. Urugero ni nka Victor Osimhen, waguzwe mu myaka yashize kandi akomeje kugirira akamaro iyi kipe. Umuyobozi w’imikino wa Napoli yizeye ko Garnacho azagira uruhare rukomeye mu kugumisha iyi kipe ku rwego rwo hejuru, cyane cyane mu mikino y’i Burayi.
Iki cyemezo cyo gushaka Garnacho kije mu gihe Napoli ishaka kongera imbaraga mu ikipe yayo nyuma yo gutakaza bamwe mu bakinnyi bayo bakomeye. Abasesenguzi mu mupira w’amaguru bemeza ko niba Napoli ishoboye kwemeza Manchester United, Garnacho azaba ari umwe mu bakinnyi bakomeye bazongera ubukana bw’iyi kipe mu myaka iri imbere.
