Naby Keita yafashije Guinea gutsinda Amavubi [Amafoto]

Umukino wa kabiri wa gicuti wahuzaga Amavubi na Guinea uganye ku musozo ibitego bibiri bya Mohamed Bayo na Naby Keita bifashije Guinea gutsinda uyu mukino.

Bayo Mohamed niwe wafunguye amazamu ku munota wa 26 w’umukino, mu gihe Naby Keita usanzwe akinira Liverpool yo mu Bwongereza yaje gushyiramo igitego cya kabiri ku munota wa 34 w’umukino.

Mu mukino wa mbere, Amavubi yari yitwaye neza atsinda ibitego 3-0 byatsinzwe na Hakimizmana Muhadjili, Usengimana Danny na Muhozi Fred ku wa Mbere.

Guinea iri mu Rwanda mu rwego rwo kwitegura imikino y’igikombe cy’Africa giteganyijwe gutangira mu mpera z’iki Cyumweru, bityo yari yasabye gukina imikino ya gicuti n’ikipe y’igihugu.

Uyu munsi Amavubi yakoze impinduka nyinshi mu bakinnyi babanjemo mu mukino wa mbere, mu gihe Guinea yo yari yagaruye kapiteni wayo Naby Keita utaragaragaye ku mukino wa mbere.

Ibitego byombi bya Guinea byabonetse mu gice cya mbere cy’umukino, mu gihe iyi kipe igiye kwitegura kuva mu Rwanda ikerekeza muri Cameroon mu mikino y’igikombe cy’Africa.