HARAGIRIMANA Dieudonne
Perezida wa kompanyi w’ikipe ya Kiyovu Sports Mvukiyehe Juvenal ashobora gusezera ku gukomeza kuyobora iyi kipe nyuma yo gushinjwa ikintu gikomeye kuva yatangira kuyobora iyi kipe.
Ku munsi w’ejo hashize ku cyumweru tariki 2 Nyakanga 2023, mu ikipe ya Kiyovu Sports hari hategenyijwe inteko rusange yagombaga guhuza abanyamuryango bose b’iyi kipe kugirango hagire ibinozwa ndetse n’ibitagenda neza bikemurwe, ariko iyi nteko yarasubitswe.
Muri iyi nteko hagombaga gutekerezwa uko ikipe ya Kiyovu Sports igiye kubaho muri iyi sezo cyane hakigwa ku bakinnyi bashya bagiye kuzanwa ariko ingingo nyamukuru hagombaga no gutorwa umuyobozi mukuru w’umuryango wa Kiyovu Sports. Impamvu iyi nteko yasubitswe ni uko abanyamuryango bagombaga kwitabira iyi nteko ntabwo bageze ku mubare uba uteganyijwe n’amategeko.
Amakuru YEGOB twamenye ni uko abanyamuryango benshi ntabwo bashaka kwitabira iyi nteko ngo nubwo yashyizwe mu byumweru 2 biri imbere ntabwo hazaboneke abanyamuryango bitewe ni uko barakariye cyane Mvukiyehe Juvenal.
Hari abanyamuryango bari bitabiriye iyi nteko ariko nabo harimo ibice. Mu banyamuryango harimo abashaka ko Mvukiyehe Juvenal asezera kuko ngo ntibibaza ukuntu umuyobozi yaje yizeza abakunzi ba Kiyovu Sports igikombe imyaka 2 yikurikiranya ariko yose bakajya bagitakaza ku mukino wa nyuma.
Muri aba harimo n’abanyamuryango benshi bafitiye icyizere Mvukiyehe Juvenal kuko ngo amaze kubaka ikipe ya Kiyovu Sports neza ariko bakibaza ukuntu yaba yarirukanye abakinnyi bari bakomeye iyi kipe ifite bikaba bigiye gutuma uyu mwaka w’imikino bizagorana kongera guhatana kubera ko batemerewe kugura abakinnyi kubera nabwo gusezerera abakinnyi bitemewe n’amategeko ibintu nabyo bakomeza ku mushinja.
YEGOB twanamenye ko ku munsi w’ejo muri iyi nteko rusange Mvukiyehe Juvenal yari yateguye gusezera ku nshingano zo gukomeza kuyobora iyi kipe kubera ko abanyamuryango be bagomba kumuba hafi bakomeje kumushinja kugurisha imikino muri Shampiyona cyane cyane umukino uba ugomba guha iyi kipe igikombe.
Kiyovu Sports kugeza ubu ntiyemerewe kwandikisha abakinnyi kubera abakinnyi bakomoka mu gihugu cya Sudan iyi kipe yasinyishije sezo 2021/2022 ubuyobozi bukongera bukabasezerera mu buryo butemewe n’amategeko. Iyi kipe yategetswe kwishyura Milliyoni zirenga 90 z’amanyarwanda kugirango yemererwe kongeramo abakinnyi.
