Epaphrodite Nsengimana
Ubushinjacyaha bwamaze gushyikirizwa dosiye iregwamo umugore w’imyaka 43 n’umuhungu we w’imyaka 15 bakekwaho kwica umwana w’umuturanyi wabo w’imyaka ibiri n’igice.
Byabereye mu Karere ka Musanze mu Murenge wa Gataraga, mu Kagari ka Gakingo aba bombi batawe muri yombi tariki 11 Ukwakira 2023, nyuma y’aho hamenyekanye amakuru ko umwana w’imyaka ibiri n’igice witwa Iradukunda Aliane wari waraye abuze, yabonetse mu rugo rwabo yapfuye.
Mu ibazwa ryo mu Bugenzacyaha, uwo mugore yemeraga icyaha cyo kwica uwo mwana bitewe n’ibibazo we n’umuhungu we bagiranye na se w’uyu wa nyakwigendera witwa Irankunda Eliazar.
Ni nyuma yo gufatira uwo muhungu w’uyu mugore mu cyuho yiba ibigori mu murima w’abaturanyi, akamutangira amakuru bombi bagacibwa amande y’ibihumbi 35 by’ubwishyu bw’ibyo bigori yari yibye, ari naho bahereye bamuhigira bamubwira ko bazamwihimuraho.
