HARAGIRIMANA Dieudonne
Mu ijoro ryo kuwa kane tariki ya 26 Ukwakira 2017 nibwo abakobwa bahataniye ikamba rya Nyampinga w’Isi (Miss World 2017) bahuriye mu muhango wo gukusanya imfashanyo yo gufasha baturage batishoboye batuye isi.
Buri mukobwa yagiye atanga impano yo gushyigikira imiryango itishoboye.Ni igikorwa gisanzwe gitegurwa n’iri rushanwa cyiswe Charity Gala Event, aho buri mukobwa atanga impano yakuye mu gihugu cye.
Nta mpano basubiza inyuma, umukobwa witabiriye iri rushanwa ashobora guhitamo: ishobora kuba igihangano gisize amarangi cyangwa ikindi kintu gifite agaciro.Nyuma iyo bamaze kubitanga kiragurishwa amafaranga avuyemo agafasha abatishoboye.
Ni igikorwa kandi cyahurije hamwe abanyacyubahiro batandukanye bo mu Bushinwa hari kandi na Nyampinga w’Isi 2016 Stephanie Del Valle.
Abakobwa bose bahataniye iri kamba uko ari 120 batanze impano zifite agaciro ka miliyoni imwe y’Amayero (euro), aya mafaranga akazahabwa abatishoboye.
Miss Iradukunda Elsa w’imyaka 19 y’amavuko uhagarariye u Rwanda muri aya marushabwa nawe yatanze icyansi (igikoresho kibuganizwamo amata).Ni mu gihe abandi batanze imitako igaragaza imico yabo, imikufi y’agaciro n’ibindi.
Mu gitondo cyo kuwa Gatanu tariki 20 Ukwakira 2017 nibwo Miss Iradukunda Elsa yageze mu gihugu cy’u Bushinwa yitabiriye amarushanwa y’ubwiza ya Miss World 2017.
Miss Elsa agiye muri iri rushanwa, nyuma ya Miss Mutesi Jolly witabiriye iri rushanwa umwaka ushize wa 2016 , agataha nta Kamba na rimwe yambitswe mu yabashije gutangwa mu ngeri zitandukanye.
Miss World y’uyu mwaka wa 2017, izamara ibyumweru bine ibera mu Bushinwa mu mijyi itandukanye irimo Sanya, Haikou na Shenzhen aho izasorezwa mu birori nyamukuru bizaba ku wa 18 Ugushyingo 2017. Rigiye kuba ku nshuro ya 67.
Umukobwa wa mbere yambitswe ikamba rya Miss World 1951, icyo gihe hatowe uwitwa Kiki Håkansson akomoka muri Sweden.
REBA AMAFOTO:
