Mu gihe hari abari mu ntambara, Mu gihugu cy’igituranyi n’u Rwanda hakorewe indege ku nshuro ya mbere [AMAFOTO]

Sosiyete ikora indege, Airplanes Africa Ltd, ikorera mu Mujyi wa Morogoro yamuritse indege ya mbere yateranyirijwe muri Tanzania.

Iyi ndege ifite ubushobozi bwo gutwara abantu babiri barimo n’umupilote (Skyleader 600), yagaragajwe mu imurikagurisha rya TIMEXPO (Tanzania International Manufacturers Expo 2023) riri kubera ahitwa Diamond Jubilee Hall muri Tanzania.

Umuyobozi wa sosiyete yayikoze, David Grolic, yatangaje ko yakozwe mu rwego rwo korohereza abacuruzi bo muri Tanzania bakora ingendo ndende z’ubucuruzi.

Yagize ati “Twakoze ubushakashatsi bunoze kugira ngo dusobanukirwe ibisabwa n’abakora ubucuruzi bakora ingendo ndende.”

“Turebye mu byavuye mu bushakashatsi, twafashe umwanzuro wo kumurika indege izafasha abacuruzi kugenda neza kandi bakitabira inama zitandukanye hanze y’akarere no gukurikirana ibindi bikorwa mu buryo bwihuse.”

Inkuru dukesha The Citizen ivuga ko iki kigo kiri gukora indi ndege yiswe Skyleader 500 izaba igenewe abakora ibikorwa by’ubuhinzi n’ubucuruzi bw’imbere mu gihugu, biteganyijwe ko izarangira umwaka utaha.

Airplanes Africa Ltd iri gukorana n’abakozi bo muri République Tchèque n’abo muri Tanzania mu gukora iyi ndege nshya.

David Grolic yavuze kandi ko izo ndege zihendutse ugereranyije n’ingendo zikoreshwa imodoka kandi ko gahunda ya mbere bafite ari ukubanza guhaza isoko ry’imbere mu gihugu mbere y’uko zishyirwa ku isoko mpuzamahanga.