Epaphrodite Nsengimana
Miss Mugabekazi Ndahiro Queen wabaye Nyampinga wu Rwanda uberwa n’amafoto mu irushanwa rya Miss Rwanda 2022, ari mu bakobwa 48 bava mu bihugu bitandukanye bya Afurika bagiye guhatanira ikamba rya Miss University Africa 2022.
Nyuma y’aho amafoto y’abahatanye ashyizwe ku mbuga nkoranyambaga z’iri rushanwa, abakobwa bahatanye muri Miss University Africa batangiye guhatanira umwanya w’uwatowe cyane uzatuma abasha kwinjira mu icumi ba mbere nta yandi mananiza.
Mu kiganiro Miss Queen yagiranye na IGIHE dukesha iyi nkuru, yagize ati “Ndasaba abantu ko banshyigikira kuko umuntu uzatorwa cyane bizamuha amahirwe yo kwinjira mu 10 ba mbere.”
Uburyo bwo gutora Mugabekazi yavuze ari ibintu byamufasha kwinjira muri Top10 kandi nta kiguzi bisaba kugira ngo atorwe.
Uyu mukobwa yagize ati “Birasaba ko ujya kuri paje y’irushanwa kuri Instagram ugakunda (Like) ifoto yanjye ukaba umpaye amahirwe yo kwinjira mu 10 ba mbere bazaba bahatanira ikamba nta yandi mananiza.”
