Mbere yo guhura na Kiyovu Sports, umukinnyi ngenderwaho muri Rayon Sports yaraye mu kabari burinda bucya

Rutahizamu Mpuzamahanga ukomoka mu gihugu cya Cameroon, Essomba Leandre Willy Onana yaraye mu kabari gaherereye i Remera mu Mujyi wa Kigali.

Ni kenshi uyu mukinnyi akunze kuvugwaho imyitwarire mibi, ndetse akaba amaze igihe adacana uwaka n’abafana ba Rayon Sports aho bamushinja ubugambanyi no kudashyira umutima ku kazi.

Amakuru dukesha ikiganiro Urukiko rw’Imikino cya Radio 10 cyo kuri uyu wa Mbere tariki 6 Gashyantare 2023, ni uko mu ijoro ryo ku wa Gatandatu tariki 4 Gashyantare Essomba Leandre Willy Onana yaraye mu kabari bikaba bivugwa ko umutoza Haringingo Francis Christian yabimenye agahita amukura mu bakinnyi 18 yifashishije.

Essomba Leandre Willy Onana yageze muri Rayon Sports mu mpeshyi y’umwaka wa 2021 asinya amasezerano y’imyaka ibiri, kuri ubu asigaranye amasezerano y’amezi atandatu azarangirana n’umwaka w’imikino wa 2022-2023.

Kuva uyu mwaka w’imikino watangira uyu mukinnyi afite ibitego birindwi mu mikino 10 ya shampiyona, kuva igice cy’imikino yo kwishyura cyatangira ntabwo yari yakina umukino, nta gihindutse umwanya we uzajya ukinwamo na Joachiam Ojera ukomoka mu gihugu cya Uganda.