Manishimwe Djabel wahoze ari umwana wa Gikundiro akaza kuyitera umugongo yabwiye abakinnyi ba APR FC umukinnyi wa Rayon Sports w’umuswa bazaba bagize icyambu

Umukinnyi wo hagati mu kibuga mu ikipe ya APR FC, Manishimwe Djabel yabwiye bagenzi be ko ubwugarizi bwa Rayon Sports budakomeye ko bagomba kuzakora ibishoboka byose bakinjiza ibitego byinshi.

Ku munsi w’ejo ku wa Gatanu tariki 10 Gashyantare 2023, ubuyobozi bw’ikipe ya APR FC bwari bwasuye abakinnyi n’abatoza maze bubasaba kuzahesha ishema abakunzi b’iyi kipe.

Ubwo Kapiteni Manishimwe Djabel yahabwaga umwanya yafashe ijambo yizeza ubuyobozi bwa APR FC intsinzi aboneraho no kubwira bagenzi be ko ubwugarizi bwa Rayon Sports bworoshye ku buryo bagomba kuzabona ibitego biri hejuru ya bibiri.

Ubwugarizi bwa Rayon Sports burimo abakinnyi barimo Kapiteni Rwatubyaye Abdul, Ngendahimana Eric, Mitima Isaac, mu gihe Ndizeye Samuel we agifite imvune y’urutugu, nta gihindutse Rwatubyaye na Mitima ni bo bazabanza mu kibuga.

Ikipe ya APR FC imaze imikino irindwi yikurikiranya itazi uko gutsindwa na Rayon Sports bimera, kuri iyi nshuro nabwo Ikipe y’Ingabo z’Igihugu irahabwa amahirwe menshi yo kuzabona amanota atatu igakomeza kuyobora urutonde rw’agateganyo rwa shampiyona y’Icyiciro cya Mbere umwaka w’imikino wa 2022-2023.