#Kwibuka29: Butoyi uyobora AJSPOR yahaye umukoro abanyamakuru b’imikino

Jean Butoyi usanzwe ari umunyamakuru w’Ikigo cy’Igihugu cy’Itangazamkuru ( RBA),akaba na perezida w’ishyirahamwe ry’abanyamakuru b’imikino mu Rwanda (AJSPOR), yahaye umukoro abanyamakuru by’umwihariko ab’imikino muri icyi gihe u Rwanda n’Isi muri rusange bari mu minsi ijana yo kwibuka ku nshuro ya 29 Jenoside yakorewe Abatutsi muri Mata 1994.

Butoyi uyobora abanyamakuru b’imikino yabasabye kwirinda gukoresha imvugo zikomeretsa ndetse bagafata iya mbere mu kurwanya abapfobya Jenoside yakorewe Abatutsi.

Butoyi Jean asanga umunyamakuru uvuga rigakera kure akaba n’ijwi ry’umuturage akwiye gufata iya mbere mu kwamagana abapfobya Jenoside yakorewe Abatutsi.

Butoyi yagize ati “Basangirangendo b’abanyamakuru b’imikino, mu rugendo rw’iminsi ijana yo kwibuka ku nshuro ya 29 Jenoside yakorewe Abatutsi, turasabwa kwirinda imvugo zisesereza ndetse zikanakomeretsa, nk’ijwi ry’abaturage tukamagana abashaka gupfobya Jenoside yakorewe Abatutsi muri Mata 1994.”