M.Ben
Bibayeho ku nshuro ya mbere muri #MissRwanda aho umukobwa ufite ubumuga bwo kutavuga yaje kwitabira iryo rushanwa.
Uwimana Jeanette ni umwe mu bakobwa 47 bari bitabiriye aya majonjora yo gushakisha abakobwa bagomba guhagararira intara y’amajyepfo mu irushanwa rya #MissRwanda2022.
Uyu mukobwa yari yambaye nimero 40 yaje imbere y’akanama nkemurampaka aherekejwe n’umusemuzi wamufashaga kumvikana n’abari bagize akanama nkemurampaka.
Abagize akanama nkemurampaka bamubajije impamvu yitabiriye iri rushanwa. Asubiza ati: “Impamvu naje mu irushanwa rya Miss Rwanda nagiraga ngo mbone urubuga rwo gushishikariza abana bafite ubumuga kwitinyuka nabo bakitabira ayo marushanwa.”
Yakomeje avuga ko impamvu yatumye aza muri aya marushanwa ari uko yumvaga agomba kwitinyuka akitabira aya marushanwa.
Ati: “Benshi bakomeje kwitinya gusa ariko nkange wize mu ishuri ry’abafite ubumuga nagize amahirwe yo gutinyuka binshishikariza kwitabira aya
marushanwa.”
Uwimana Jeanette yumvaga ibyo abajijwe ariko gusubiza agakoresha amarenga aho umusemuzi we yahitaga asemura. Uyu mukobwa kandi yahawe ‘YEGO’ eshatu n’abagize akanama nkemurampaka muri irushanwa kubera ukuntu yasobanuye neza.
