KNC wifuza kuzashengura imitima y’Abareyo yamaze gushyira hanze ibiciro byo kwinjira ku mukino Gasogi United izakira Rayon Sports

Kakooza Nkuriza Charles uzwi nka KNC yamaze gutangaza ibiciro byo kwinjira ku mukino ikipe ya Gasogi United itozwa na Paul Kiwanuka izakira Rayon Sports itozwa na Haringingo Francis Christian.

Ku wa Gatandatu tariki 18 Gashyantare 2023, Saa Cyenda n’igice z’amanywa kuri Stade ya Bugesera ikipe ya Gasogi United izaba yakiriye Rayon Sports mu mukino w’umunsi wa 20 wa shampiyona y’Icyiciro cya Mbere umwaka w’imikino wa 2022-2023.

Mu gitondo cyo kuri uyu wa Kabiri tariki 14 Gashyantare, nibwo mu kiganiro Rirarashe cya Radio/TV1 Rwanda KNC na Mutabaruka Angelbert batangaje ko kwinjira ahasanzwe azaba ari ibihumbi bitatu, ahatwikiriye azaba ari ibihumbi bitanu, mu gihe muri VIP azaba ari ibihumbi 20 by’Amanyarwanda.

Umuyobozi w’ikipe ya Gasogi United amaze iminsi akubita agatoki ku kandi avuga ko azatsinda Rayon Sports nk’uko yabikoze mu mukino ubanza wabaye tariki 23 Ukuboza 2022 ubwo Gasogi United yatsindaga Rayon Sports igitego kimwe ku busa cyinjijwe na Malipangou Theodore Christian.

Ku rutonde rw’agateganyo rwa shampiyona y’Icyiciro cya Mbere, ikipe ya Gasogi United iri ku mwanya wa gatatu n’amanota 36 aho ikurikirwa na Rayon Sports zinganya amanota zigatandukanywa n’umubare w’ibitego zizigamye.