Kigali: Umugabo yapfuye akubiswe umugeri wo mu bugabo ubwo yasangwaga ari kwihagarika hafi y’ubwiherero kandi bitemewe

Abaturage batuye mu Karere ka Nyarugenge mu murenge wa Rwezamenyo bakomeje gutabariza umugabo wita Hakizimana Jean Cloude wishwe akubiswe umugeri mu bugabo.

Abaturage baganiriye na BTN TV bavuze ko uyu mugabo yishwe ubwo yakubitwaga umugeri mu bugabo ubwo yasangwaga ari kwihagarika ahantu hatemewe.

Uwatanze amakuru yavuze ko Jean Cloude yagiye kwihagarika mu bwiherero bw’aho yari yagiye gufata ibyo kurya gusa ngo asangamo undi muntu ni uko yigira inama yo kujya kwihagarika hepfo y’ubwiherero, aho nyiri aho yahamusanze akamukubita imigeri myinshi afanyije n’umukozi we.

Akomeza avuga ko uyu mugabo yakubiswe agataha yanegekaye, aho yabwiye abaturanyi be ko yumva yabyimbye mu mpyiko ni uko bamujyana kwa muganga aho nyuma yaje kwitaba Imana.

Abaturage bahuriza ku kuba yarishwe n’iyi migeri yakubiswe kuko ngo ntabwo yari asanzwe afite indi ndwara, akaba ari naho bahera basaba ubutabera.

Aba baturage barasaba ubutabera aho batumva ukuntu umuntu wamukubise aburana ari hanze kandi umuntu wabo yishe yaramaze gushyingurwa.