Epaphrodite Nsengimana
Mu karere ka Gasabo mu murenge wa Rusororo habereye impanuka y’ikamyo yavaga mu Karere ka Rwamagana yerekeza mu Mujyi wa Kigali, maze umugenzi umwe muri babiri bari bayirimo ahita ahasiga ubuzima.
Iyi mpanuka yabereye ahitwa Bisenga i Rusororo mu gitondo cyo kuri uyu wa Kabiri tariki ya 12 Nzeri 2023, aho iyi kamyo yari itwaye lisansi yarenze umuhanda maze igonga umukingo igwa igaramye ipfiramo umuntu umwe, umushoferi we yakomereka.
Lisansi iyi kamyo yari twaye yamenetse mu muhanda ndetse bisaba ko ibanza gukurwamo kugira ngo umuhanda ukomeze kuba nyabagendwa.
Nyuma y’iyi mpanuka, Polisi yahise icisha itangazo kuri Twitter ivuga ko kugeza ubu umuhanda Kigali-Rwamagana utari nyabagendwa ndetse isaba abawukoresha kwihanganira izi mpinduka mu gihe imirimo yo gukuramo iyo kamyo ikirimo gukorwa.
