Kayonza: umwana w’imyaka 7 yishwe n’amazi

Mu karere ka Kayonza haravugwa inkuru y’umwana w’imyaka 7 witabye Imana watwawe n’umuvu w’amazi watewe n’imvura nyinshi yaguye muri aka Karere.

Uyu mwana wigaga mu mwaka wa mbere w’amashuri abanza yapfuye ku gicamunsi cyo kuri uyu wa Kabiri tariki ya 10 Mutarama 2023 mu Mudugudu wa Rwakabanda mu Kagari ka Ryamanyoni mu Murenge wa Murundi.

Umunyamabanga Nshingwabikorwa w’Umurenge wa Murundi, Gashayija Benon, yavuze ko uyu mwana yishwe n’umuvu w’amazi nyuma yo guta urukweto mu muferege akajya kurukuramo amazi akamurusha imbaraga.

Yavuze ko undi mwana bari bari kumwe yahise asubira ku ishuri ajya kubibwira abarimu n’ubuyobozi bw’ikigo baraza ngo barakurikirana babona uwo mwana hirya gato yamaze gupfa.

Uyu muyobozi yaboneyeho gusaba ababyeyi gukurikirana abana babo bakababuza gukinira mu mazi kuko bishobora kubashyira mu kaga.