Kayonza: Abantu barenga 30 bajyanywe mu bitaro kubera kunywa ubushera mu kirori

Abaturage 84 bo mu Murenge wa Murama mu Karere ka Kayonza biganjemo abo mu Itorero ry’Abadiventisiti b’Umunsi wa Karindwi, barwaye mu nda, abasaga 30 bajyanwa kwa muganga nyuma yo kunywa ku bushera bikekwa ko bwahumanyijwe.

Ibi byabaye ku Cyumweru, tariki ya 2 Mata 2023, ubwo Abadiventisiti bo mu Murenge wa Murama mu Kagari ka Murama bari bakoresheje ibirori byo kwishimira ko hari ababatijwe.

Ababyitabiriye basangiye ubushera bwenzwe n’umuturage umwe bari bahaye isoko, bukeye bwaho ababunyweyeho bose batangiye kuribwa mu nda kugeza ubwo bamwe bajyanywe kwa muganga maze umwana w’imyaka ibiri bamwohereza ku Bitaro bya Rwinkwavu.