Kubwayo Mc croix
Umuhanzikazi w’icyamamare ukomoka muri Colombie, Karol G, yashyize hanze album ye nshya yise Tropicoqueta ku wa 20 Kamena 2025, igaragaramo umwimerere n’udushya duturuka mu ndirimbo z’ibihe byashize. Iyi album irimo indirimbo 20 zihuza injyana zitandukanye nka reggaetón, cumbia, vallenato, bachata, mariachi ndetse na merengue, byose bivanze n’umudiho w’iki gihe.
Tropicoqueta ni ijambo rikomatanya “trópico” n’ijambo “coqueta”, rikaba ryerekana ubusabane, ubwiza n’imyidagaduro y’umugore wa Latin. Karol G yavuze ko yahisemo gusubira mu ndirimbo yakundaga akiri muto, agamije guha icyubahiro abagore bamubanjirije mu rugendo rw’umuziki.
Iyi album yanahuje Karol G n’abahanzi bakomeye barimo Thalía, Marco Antonio Solís, na Manu Chao. Harimo kandi amashusho y’indirimbo Papasito, ifite ishusho ya sinema za kera, ikinwamo na Danny Ramírez ndetse n’abakinnyi b’ibyamamare nka Gaby Spanic.
Karol G yanashimangiye ubufatanye bw’abagore mu ndirimbo Amiga Mía, yerekana ubuvandimwe n’imbaraga z’igitsinagore mu muziki wa Latin. Album Tropicoqueta si iy’imyidagaduro gusa, ni ubutumwa bukomeye bw’umurage, umuco, n’agaciro k’umugore mu buhanzi bugezweho.
