Kandi barakinanye: Karim Benzema yavuze amagambo asesereza kuri Cristiano Ronaldo wabasuye aho bakorera imyitozo

Kuwa Gatanu tariki 13 Mutarama nibwo kizigenza Cristiano Ronaldo yasuye Real Madrid aho ikorera imyitozo muri Saudi Arabia, yitegura gukina na Fc Barcelona mu mukino wa nyuma wa Supercopa de Espana. 

Iyi mikino yabereye muri Saudi Arabia ndetse n’umukino wa nyuma niho uri bukinirwe. Cristiano Ronaldo nyuma yo gusura ikipe yakoreyemo amateka yifotazanyije n’abakinnyi barimo: Rodrygo, Vinicius, Militao n’umutoza Carlo Ancelotti. 

Karim Benzema ejo ni mugoroba ari mu kiganiro n’itangazamakuru, yabajijwe impamvu atifotozanyije na Cristiano Ronaldo ndetse n’umubano bafitanye muri rusange. Uyu mukinnyi yasubije agira ati “Birashimishije kuba Cristiano Ronaldo ari inaha muri Saudi Arabia, nizeye ko azagumya gutsinda ibitego ndetse akaguma no ku rwego rwe.

Yaje mu myitozo yacu ariko nta foto dukeneye ngo tubereke ko turi inshuti. Ntabwo dukeneye Instagram na twiter cyangwa ibindi bimeze gutyo. N’ubwo yaje hariya, nta mwanya nari mfite wo kumusuhuza. Nizeye ko ndamubona ku mukino wa nyuma, nurangira nibwo ndavugana nawe”.