HARAGIRIMANA Dieudonne
Umuhanzi w’indirimbo zo kuramya no guhimbaza Imana, Israel Mbonyi yatangaje ko agiye gukorera ibitaramo mu gihugu cy’u Burundi, ni nyuma y’ibiganiro yagiranye n’abamutumiye. Igisigaye ni ugutangaza amatariki azakoreraho ibitaramo.
Kuri uyu wa Mbere tariki 12 Ukuboza 2022, Umuyobozi wa Buja Events, Alberic Ndayegamiye yagiranye ibiganiro na Israel Mbonyi bigamije gusubukura ibitaramo yagombaga gukorera mu Burundi.
Ndayegamiye yavuze ko afatanyije na Israel Mbonyi, hari ibyiza bari gutegurira abafana be n’abakunzi b’umuziki.
Ibi biganiro byahuje Israel Mbonyi na Ndayegamiye byanitabiriwe na Coach Gael, umujyanama w’umuhanzi Itahiwacu Bruce wamamaye nka Bruce Melodie.
Israel Mbonyi yabwiye InyaRwanda ko ibiganiro ku gusubukura ibitaramo yagombaga gukorera mu Burundi byamaze kurangira.
Ati “Twari mu biganiro kandi byamaze kurangira. (Ku kujya gutaramira mu Burundi).”
Uyu muhanzi wakunzwe mu ndirimbo zirimo ‘Agasambi’ na ‘Ndanyuzwe’ yari afite ibitaramo bitatu mu Burundi muri Kanama 2021, bisubikwa kubera ko ababiteguye nta rwego na rumwe rwa Leta bamenyesheje iby’ibi bitaramo.
Tariki 28 Nyakanga 2021, Minisiteri Ishinzwe Iterambere ry’Abarundi n’Umutekano w’Abaturage yanyujije kuri twitter yabo (MininterInfosBi), ubutumwa buvuga ko ibitaramo Israel Mbonyi yari gukorera mu Burundi byahagaritswe.
Iyi Minisiteri yavuze ko Israel Mbonyi, “atarahabwa uburenganzira n’abayobozi bo mu Burundi babifitiye ububasha” bumwemerera kuhakorera ibitaramo.
Ibi bitaramo bya mbere Israel Mbonyi yari agiye gukorera mu Burundi byategurwaga n’Umuyobozi washinze sosiyete y’ubucuruzi ya Akeza Creations, Kavakure Valentin.
Agiye gusubukura gutaramira muri iki gihugu cy’abaturanyi abifashishijwemo na Alberic Ndayegamije, washinze Buja Events.
Israel Mbonyi agiye gutaramira mu Burundi abisikana na Bruce Melodie, wahakoreye ibitaramo bibiri nyuma yo gufungwa.
Uyu muhanzi kandi ari kwitegura gutaramira abanyarwanda mu gitaramo cyo kumurika album yise ‘Icyambu Live Concert’, kizaba ku wa 25 Ukuboza 2022 muri BK Arena.
