Kubwayo Mc croix
Barcelona yongeye kwereka Real Madrid ko iri ku rwego rwo hejuru, itsinda Los Blancos ibitego 5-2 mu mukino wa nyuma wa Super Cup wabereye muri King Abdullah Sports City. Uyu mukino wasize Real Madrid yandagajwe, cyane kubera ubwirinzi bwayo bwaranzwe no kudohoka guhambaye.
Ku munota wa mbere w’umukino, Kylian Mbappé yafunguye amazamu ku ruhande rwa Real Madrid, atsinda igitego cyiza nyuma yo kuyobora contre-attaque itangaje. Gusa, ntibyatinze kuko Lamine Yamal yahise yishyura, atsinda igitego cyiza cyerekanye ko afite impano idasanzwe.
Robert Lewandowski yatsinze penaliti ku munota wa 36, naho Raphinha yongeza ikindi gitego ku makosa y’abakinnyi b’inyuma ba Real Madrid, ashyiraho umutwe udasanzwe. Alejandro Balde nawe yahise yishyura ikosa ry’umupira wakuwemo nabi kuri koroneri, atsinda igitego cya kane ku ruhande rwa Barcelona.
Raphinha yongeye guhagarika umutima abakinnyi ba Real Madrid ubwo yatsindaga igitego cya gatanu mu gice cya kabiri, yerekana ubuhanga mu gukinisha Tchouameni no guca mu rihumye Thibaut Courtois.
Real Madrid yabonye agahenge gato ku gitego cya Rodrygo cyavuye kuri coup franc nziza, ariko ntiyashoboye kugaruka mu mukino, n’ubwo Barcelona yari isigaye ari abakinnyi 10 nyuma yo guhabwa ikarita itukura kwa Wojciech Szczesny.
Uyu mukino wagaragaje intege nke zikomeye mu bwugarizi bwa Real Madrid ndetse n’uburyo abakinnyi nka Jude Bellingham na Lucas Vázquez batashoboye kwitwara neza ku rwego rwabo rusanzwe.
