Intamati Haaland na Manchester City ye bahorahoje ikipe ya Wolves

Ikipe Manchester City yakosoye ikipe ya Wolves ubwo yayitsindaga ibitego 3 ku busa mu mukino Erling Braut Haaland yatsinzemo ibitego bitatu ( Hattrick) wenyine ikaba ibaye Hattrick ya kane muri shampiyona uyu mwaka aho igeze hagati.

Wolverhampton Wanderers yatangiye umukino ihuzagurika kuko mu minota 15 ya mbere y’umukino yarimaze kubona amakarita 3 y’umuhondo yahawe Max Kilman, Mario Lemina n’ iyahawe umutoza.

Pep Guardiola yari yashoye abakinnyi barimo Ederson, Lewis, Stones, Akanji, Laporte, Rodrigo, De Bruyne, Gundogan, Mahrez, Grealish na Haaland
Manchester City n’iyo yafunguye amazamu ku munota wa 40 gitsinzwe na Haaland ku mupira mwiza yarahawe na Kevin Debruyne.
Wolves yari yasuye abanyamugi b’ I Manchester yari yabanje mu kibuga José Sá; Semedo, Collins, Kilman, Bueno; Lemina, Rúben Neves, Matheus Nunes; Adama Traoré, Raúl Jiménez na Hwang.
Ku munota wa 50 Erling Haaland yatsinze igitego cya kabiri kuri penaliti yarikorewe Gundogan maze Haaland ayiterekamo neza.

Ku munota wa 54 Riyad Mahrez yahaye umupira mwiza  Haaland aterekamo igitego cya gatatu ku ruhande rwa Manchester City kiba kibaye n’igitego cye cya gatatu mu mukino gihita kiba n’igitego cya 25 muri shampiyona.
Umukino warangiye Manchester City itsinze ibitego bitatu ku busa binayigumisha ku mwanya wa kabiri ku rutonde rw’agateganyo.