Social Mula
Biteganyijwe ko imikino itanu ariyo yonyine izakinwa muri izi mpera z’icyumweru muri shampiyona y’ikiciro cya mbere mu Bwongereza, nyuma yuko indi mikino ine isubitswe kubera coronavirus.
Shampiyona y’ikiciro cya mbere mu Bwongereza yatangaje ko umukino wa Manchester United na Brighton and Hove Albion wasubitswe kubera ko iyi kipe y’i Manchester idafite abakinnyi bavamo ikipe yuzuye.
Nyuma yaho indi mikino ine byemejwe ko itazakinwa bidasubirwaho, harimo imikino ya Southampton vs Brentford, Watford vs Crystal Palace, West Ham United vs Norwich City na Everton vs Leicester City yose yasubitswe.
Ni ubwo hari abavuga ko shampiyona yasubikwa, mu itangazo shampiyona y’ikiciro cya mbere mu Bwongereza yashyize ahagaragara yagize ati: “Indi mikino yose yari iteganyijwe kuba muri izi mpera z’icyumweru izakinwa nk’uko iteganyijwe nta gihindutse.”
Andi makuru:
- Liverpool yatsinze Newcastle ikomeza kotsa igitutu Manchester City
- Chelsea yanganyije na Everton, irushwa amanota ane na Manchester City
Brentford na Watford zose zafunze ibibuga by’imyitozo, ndetse Watford yo ntabwo yari ifite abakinnyi yakoresha ku mukino wa Crystal Palace.
Norwich City nayo ntabwo yabona abakinnyi bakina umukino wayo kubera ibibazo by’uburwayi, imvune na coronavirus.
Leicester City nayo yahagaritse imyitozo kugira ngo ibanze yite ku kibazo cya coronavirus cyaje mu ikipe yabo.
Muri iki Cyumweru hagati imikino ya shampiyona yari yakomeje, ariko hakinwe imikino itatu yonyine.
Umukino wagombaga guhuza Manchester United na Brentford warasubitswe, mu gihe Watford na Leicester City nayo ari amwe mu makipe afite imikino yasubitswe.
