Social Mula
Umukino wagombaga guhuza Liverpool na Leeds United ku munsi ukurikira Noël, Boxing Day, wasubitswe, hamwe n’uwagombaga guhuza Wolverhampton Wanderers na Watford.
Leeds United na Watford zombi zasanzwemo umubare runaka w’abakinnyi banduye icyorezo cya coronavirus, bisobanuye ko imikino yazo yahise isubikwa bidasubirwaho.
Mu mikino yari iteganyijwe kuba muri iki Cyumweru hagati muri shampiyona y’ikiciro cya mbere mu Bwongereza, ine yonyine niyo yabashije gukinwa nyuma yuko Omicron ikomeje guteza ikibazo muri ruhago.
Mu itangazo Premier League yashyize ahagaragara yagize iti: “Shampiyona irabizi ko umwanzuro wo gusubika iyi mikino bitengushye abafana ndetse irumva uburyo batibyishimiye mu gihe baba bashaka gusoza umwaka bajya kureba imikino y’umupira w’amaguru.
“Shampiyona igerageza gukora ibishoboka byose ngo imikino ikinwe nkuko iteganyijwe, ariko bitunguranye gusubika imikino bibaho kuko ubuzima aricyo cy’ibanze cyane.
“Tuzakomeza kubwira abafana mu gihe umukino runaka ushobora gusubikwa.”
Leeds United yo yari yabashije gukina umukino wayo uheruka yatsinzwe mo na Arsenal, ariko Watford yo ntabwo yabashije gukina imikino ibiri iheruka harimo uwa Burnley na Crystal Palace.
Shampiyona y’ikiciro cya mbere mu Bwongereza yatangaje ko umukino wa Leeds United na Aston Villa uzaba ku wa 28 Ukuboza uzakinwa nkuko uteganyijwe, ndetse n’uzahuza Watford na West Ham United kuri uwo munsi uzakinwa.
