HARAGIRIMANA Dieudonne
Nadia Nakai uzwi cyane ku izina rya ‘Bragga’ umaze iminsi ari mu gahinda ko gupfusha umukunzi we nawe w’umuraperi Kiernan Jarryd Forbes wamamaye ku izina rya ‘AKA’.
Nyuma y’iminsi 10 umukunzi we yitabye Imana, Nadia yerekanye agahinda afite ku mutima binyuze mu magambo yanditse kuri Instagram ye ubwo yamusezeraga.
Akoresheje urubuga rwa Instagram, Nadia Nakai yasangije abamukurikira amashusho n’amafoto yaranze urukundo rwe na AKA ubwo yarakiriho maze ayakurukiza ubutumwa bumusezeraho bwuzuye intimba.
Mu magambo ye Nadia yagize ati “Umutima wanjye washengutse, uku siko ahazaza hacu hagombaga kumera. Siniyumvisha ko nagusezeyeho bwa nyuma ejo”.
Nadia Nakai yakomeje agira ati “Sinumva ko ntazongera kukubona na rimwe mu buzima bwanjye. Wankundaga ukabyerekana warakoze mukunzi.”
“Warandinze, waransegeraga kandi wanteraga gukora neza. Birangoye kubona amagambo navugamo uburyo ngukundamo. Nzagukumbura cyane.”
Muri ubu butumwa burebure cyane Nadia yabusoje amusezeraho ndetse anavuga ko afite ibibazo byinshi yabaza Imana yatumye abura umukunzi we.
