Imana yamanukiye muri BK Arena maze ikorera muri Apostle Grace Lubega akora ibitangaza bitigeze bibaho

Apostle Grace Lubega uyobora Phaneroo Ministries International ifite icyicaro i Kampala muri Uganda, yafashije benshi mu giterane yakoreyemo ibitangaza abantu bagakizwa indwara.

Ni mu giterane cyiswe Rwanda Revival Conference cyabaye ku wa 4 Gashyantare 2023, muri BK Arena. Cyateguwe na Manifest Fellowship ku bufatanye n’andi matorero yo mu Rwanda. Kwinjira byari ubuntu ku bantu bose.

Iki giterane cyari gifite ibice bibiri: Igice cya mbere cyari cyihariye ku bakozi b’Imana nk’abashumba, abadiyakoni, abaririmbyi n’abandi benshi, cyabaye taliki 3 Gashyantare 2023 kuri Hilltop Hotel i Remera.

Igice cya kabiri cya rusange ari na cyo cyashyize akadomo ku giterane cyabaye taliki 4 Gashyantare, muri BK Arena. Cyitabiriwe n’abantu ibihumbi, kirangwa no guhembuka mu Ijambo ry’Imana n’ubusabane bukomeye mu kuramya Imana.

Muri iki giterane Elayone Music ndetse na True Promises Ministries, nibo babanje gufasha abantu mu mwanya wo kuramya no guhimbaza Imana.

Aba bakurikiwe na James na Daniella. Iyi couple imaze kubaka izina mu kuramya no guhimbaza Imana yaririmbye indirimbo zirimo ‘Mpa Amavuta’, ‘Umwami ni mwiza’, ‘Mutima wanjye himbaza iyo Mana’ n’izindi zitandukanye.