Igitaramo cya Iwacu Muzika kirasubitswe bitunguranye nyuma y’urupfu rwa Jay Polly.

Kompanyi ya East African Promoters (EAP) isanzwe itegura ibitaramo bya Iwacu Muzika bitambuka kuri television Rwanda, yatangaje icyari giteganyiwe kuri uyu wa Gatandatu kitakibaye mu rwego rwo kunamira no guha icyubahiro umuhanzi Jay Polly witabye Imana.

Mu itangazo EAP yashyize hanze kuri uyu wa Gatandatu yamenyesheje abakunzi b’ibi bitaramo ko icyari giteganyijwe kuri uyu wa Gatandatu tariki ya 4 Nzeri 2021 kitakibaye ahubwo cyimuriwe ku itariki ya 11 Nzeri 2021.

Byari biteganyijwe ko kuri uyu wa Gatandatu umuhanzikazi Marina na Kalvin Mbanda aribo bagombaga gutaramira Abanyarwanda muri ibi bitaramo.

Biteganyijwe ko umuhanzi Jay Polly ashyingurwa kuri iki Cyumweru tariki ya 5 Nzeri 2021 ku isaha ya saa kumi z’umugoroba mu irimbi rya Rusororo.