Ibya Byiringiro Lague byaburiwe umuti, no kujya gukina hanze bishobora kugorana

Rutahizamu w’ikipe ya APR FC bivugwako yamaze gusinyira ikipe ya Sundvikens IF yo mu gihugu cya Suedé kugenda bikomeje kugorana cyane kugeza ubu.

Byiringiro Lague hashize igihe kirenga ukwezi ikipe ya Sundvikens IF itangaje kumugaragaro ko yamaze gusinyisha uyu rutahizamu w’umunyarwanda wari usanzwe akinira ikipe ya APR FC. Iyi kipe ya APR FC yaje gusaba Sundvikens IF ko yaba ibahaye igihe gito uyu musore akabanza akabakinira imikino 2 yari ikomeye irimo uwa Kiyovu Sports ndetse na Rayon Sports.

Iyi kipe ya Sundivikens IF yaje kwemerera APR FC ko yaba imufite cyane ko n’isoko ry’igura n’igurishwa ry’abakinnyi muri iki gihugu cya Suedé ritari ryarafunguwe ariko Lague ahabwa tariki 15 Gashyantare 2023 ko agomba kuba yagiye muri iyi kipe ariko kugenda byaranze.

Muri iki cyumweru nibwo byavuzweko Byiringiro Lague yabuze VISA yo kwerekeza muri iki gihugu akaba ari nabyo bikomeje gutuma aterekeza muri iyi kipe yo ku magabane w’iburayi, ariko amakuru YEGOB yamenye ni uko mu cyumweru gitaha aribwo azabona igisubizo kuri VISA yongeye gusaba.

Ibi bikomeje gutangazwa, benshi bakomeje kwemeza ko bishobora kuba ari ibinyoma bikomeye kubera ko ukurikije incuro zose Lague yagiye ku mugabane w’iburayi ntabwo VISA yaba ikomeje kubura kugeza ubu ahabwo wasanga hari ibitaranozwa neza muri dosiye yo kugurisha uyu mukinnyi kw’ikipe ya APR FC.