HARAGIRIMANA Dieudonne
Abakunzi n’abafana b’umuraperi Papa Cyangwe batewe urujijo no kuba uyu muhanzi wagombaga gusohora indirimbo 6 yarahisemo gusohora 5, arangije yongeramo umuhanzi mushya kuri Ep ye nshya aherutse gushyira hanze.
Tariki 24 Ugushyingo 2021 nibwo umuraperi Papa Cyangwe yatangaje ko yitegura gushyira hanze Ep nshya yise “Sitaki” mu ijambo ry’igiswahili risobanura ngo simbishaka mu kinyarwanda cyiza.
Urutonde rw’izi ndirimbo rwagaragazaga ko zari indirimbo 6 zose hamwe arizo ‘Kanjenje’, ‘Aho’ ‘puna’, ‘ ‘Sitaki’, ‘Niki Niki’ na Nyaza’. Uru rutonde rwariho abaraperi batatu aribo Chriss Eazy mu ndirimbo ‘Kanjenje’, Bushali mu ndirimbo ‘aho’ na Logan Joe mu ndirimbo ‘Puna’.
Papa cyangwe yashyize hanze uru rutonde rw’izi ndirimbo ubwo hari hamaze iminsi bihwihwiswa ko yaba yaramaze gutandukana na Rocky Entertainment yarebereraga inyungu ze gusa impande zombi zikirinda kugira icyo zitangaza muri iyo minsi nubwo ibimenyetso simusiga byari biri hanze.
Nyuma y’iminsi mike tariki 08 Ukuboza 2021 nibwo kompanyi ya Rocky Entertainment yasohoye itangazo ryemeza ko iyi kompanyi Papa Cyangwe batagikorana ndetse ko bazakomeza kumushyigikira nkuko bari basanzwe babikora. Iri tangazo kandi ryemezaga ko uyu muhanzi ariwe bwite wisabiye ko bahagarika imikoranire.
Iri tangazo ryasembuye Papa Cyangwe abihakana yivuye inyuma maze abwira abamukurikira ko tariki 24 Ukuboza 2021 yagombaga gushyira ukuri kose hanze binyuze muri iyi Ep nshya yiteguraga gushyira hanze yari iriho indirimbo 6 twavuze haruguru.
Itariki yemeje yarageze gusa abategereje ukuri amaso ahera mu kirere. Ku rundi ruhande Papa Cyangwe yahise yemeza ko we na Rocky bamaze kwiyunga binyuze mu magambo yatangaje ku mbuga nkoranyambaga ze ati”Utazashukwa n’amafaranga ,umwana yubaha se icyo avuze arakora ntarenzaho ngo akose”
Ubwiyunge bw’aba bombi bwakiriwe neza n’abakurikirana umuziki nyarwanda bavuga ko byari guteza igihombo gikabije ku mpande zombi gusa ku rundi ruhande hari bamwe mu bafana bagiye mu gihirahiro cy’ukuri basezeranyijwe bagaheba.
Kwiyunga kwatumye Papa Cyangwe areka gusohora indirimbo yitiriwe Ep ye nshya?
Papa Cyangwe akimara gutangaza amagambo agaragaza ko yiyunze na Rocky Kimomo yahise ahindura indirimbo zari 6 zagombaga gusohokera rimwe maze akuramo indirimbo imwe yari yitiriwe iyi EP. Iyi ndirimbo atashyize hanze yitwaga “Sitaki’ ni nayo yonyine yakuweho kuri iyi Ep.
Kudasohora iyi ndirimbo byashyize benshi mu gihirahiro bibaza ikihishe inyuma yabyo gusa bivugwa ko iyi ndirimbo ishobora kuba ariyo yari ihatse ukuri kose kw’itandukana rya Papa Cyangwe na Rocky Entertainment.
Andi mukuru avuga ko iyi ndirimbo yari yitiriwe iyi Ep yari gushyira hanze imikoranire yabo kuva igihe bahereye ibintu byatumye aba bombi bongera kwicara ku meza y’ibiganiro bagahitamo kutiteza rubanda.
Andi makuru avuga ko umuraperi K8 Kavuyo ari mu bagize uruhare mu gusubirana kw’aba bombi gusa bagasubirana mu buryo bw’ubujyanama bitandukanye n’uburyo mbere bakoranagamo.
Papa Cyangwe bitunguranye yongeyemo undi muhanzi kuri Ep ye
Bitunguranye Papa Cyangwe wari watangaje ko yifashishije abahanzi batatu mu buryo bwatangaje benshi yasohoye Ep iriho abahanzi 4. umuhanzi wiyongereyeho ni uwitwa Yannick MYK uzwi mu ndirimbo nka Agatogo yakoranye na Papa Cyangwe,Mukubua yakoranye na Ish Kevin,2 Saint na Rapxolutely n’izindi.
Uyu muhanzi bahuriye mu ndirimbo ‘Nyaza’ Papa cyangwe yari yatangaje ko azakora wenyine. Iyi Ep yamaze kujya hanze kandi irimo kwakirwa neza n’abakunzi b’uyu muraperi.
