Kubwayo Mc croix
Ngarambe Joseph w’imyaka 34 wari uzwi ku izina rya Ngarambe w’i Nyaruhombo, wo mu Kagari ka Nyaruhombo, Umurenge wa Rwaniro mu Karere ka Huye, yasanzwe mu mugezi wa Mwogo yapfuye, nyuma yo kumara iminsi itatu aburirwa irengero. Amakuru y’urupfu rwe yamenyekanye ku wa 08 Ugushyingo 2024, aho bivugwa ko yavuye mu rugo ku mugoroba w’uwa Mbere ajya kuroba amafi, akazi yari asanzwe akora.
Mujawayezu Triphine, umugore we, yavuze ko yagiye kuroba mu ma saa tatu z’ijoro ariko ntiyagaruka. Yakomeje avuga ko yategereje ko umugabo we agaruka ariko araheba, nyuma y’iminsi itatu bamusanze mu mugezi wa Mwogo.
Abaturanyi ba Ngarambe bavuze ko bari bamuzi nk’umuntu ukunda guhamagara kuri radiyo zitandukanye zirimo Radiyo y’Abaturage ya Huye, Radiyo Salus, ndetse n’iz’i Kigali.
