Epaphrodite Nsengimana
Nyuma y’umukino wa 1/2 wo kwishyura mu Gikombe cy’Amahoro, wabaye ku wa Kabiri tariki ya 23 Mata 2024, abakinnyi ba Gikundiro barimo nka Youssef Rharb, Khadime Ndiaye na Charles Bbaale barwanye n’aba Bugesera FC barimo Isingizwe Rodrigue na Hoziyana Kennedy.
Ubwo Umusifuzi Mukansanga Salima Rhadia yari asoje umukino, abakinnyi ba Bugesera FC bagiye kwishimira intsinzi imbere y’abafana ba Rayon Sports, bakora ikimenyetso cyo kubacecekesha.
Myugariro Isingizwe Rodrigue wa Bugesera, we yagiye kubikorera n’imbere y’intebe y’abatoza n’abakinnyi ba Rayon Sports bari babuze intege zibahagurutsa, mu rwego rwo kubishyura kuko Julien Mette yabikoze ku mukino Gikundiro yatsinzemo Bugesera FC ku wa Gatandatu muri Shampiyona.
Byatumye Youssef Rharb na Isingizwe baterana ibipfunsi mu gihe na Hoziyana Kennedy yagaragaye ashaka kurwana na Youssef, bituma bombi bahabwa ikarita itukura.
Mu gihe abasifuzi bayobowe na Mukansanga bibwiraga ko birangiye, basohotse mu kibuga kuko imvura yari itangiye kugwa, abakinnyi bari basigaye inyuma bongeye gusakirana, Khadime Ndiaye na Charles Bbaale bashaka kurwana n’abakinnyi ba Bugesera FC na Team Manager wayo, Eric Dinho wasubiye inyuma akagwa hasi mbere yo guhungishwa na Gatete uri mu bari bashinzwe umutekano ku kibuga.
Polisi y’Igihugu yahise yinjira mu kibuga yihuta, ifata abakinnyi bashakaga kurwana barimo Umunyezamu Khadime Ndiaye ndetse na Team Manager wa Rayon Sports, Mujyanama Fidèle, wagaragazaga ko atemeranya n’ibiri kuba.
