Kubwayo Mc croix
Harry Kane, rutahizamu w’umwongereza uzwiho gutsinda ibitego byinshi ariko ntibiherekezwe n’ibikombe, yasoje inkuru ndende y’umuvumo yamubayeho imyaka 15, ataratwara igikombe na kimwe ku rwego rwo hejuru. Yegukanye Bundesliga ari kumwe na Bayern Munich, kikaba ari igikombe cye cya mbere kuva yatangira gukina ruhago nk’uwabigize umwuga.
Kane w’imyaka 31 yinjiriye muri Bayern Munich avuye muri Tottenham Hotspur mu mpeshyi ya 2023, atanzweho akayabo ka miliyoni 100 z’amapawundi. Mu mwaka we wa mbere muri Bundesliga, yigaragaje ku rwego rwo hejuru atsinda ibitego 36 mu mikino ya shampiyona, aba umukinnyi wa mbere uyoboye abandi mu gutsinda ibitego.
Nubwo umukino Bayern yagombaga gutwariramo igikombe atawukinnye kubera guhagarikwa n’ikarita ya gatanu y’umuhondo, Kane yifatanyije n’abandi bakinnyi ku ntebe y’abasimbura ubwo Bayern yakinaga na RB Leipzig. Baje kunganya 2-2, bituma itegereza undi munsi kugira ngo byemezwe ko batwaye igikombe.
Ibyishimo byabaye byose ku Cyumweru, ubwo Bayer Leverkusen yanganyaga na SC Freiburg 2-2, bikaba bihagije kugira ngo Bayern yegukane igikombe cya 33 cya Bundesliga, ndetse Kane agire icyo cy’umwihariko mu rugendo rwe rw’umupira w’amaguru.
Yavuze ati: “Hari abantu benshi bamaze imyaka bavuga ko ntaratwara igikombe. Nari nkeneye kubacecekesha. Nubwo ntari mu kibuga, nari hafi y’itsinda ry’abakinnyi kandi nari niteguye kwizihiza kurusha buri wese.”
Yari kumwe na bagenzi be barimo Eric Dier, Joshua Kimmich na Serge Gnabry, baririmbana indirimbo “We Are The Champions”, Kane ashyira hanze amashusho binyuze kuri konti ye ya X.
Jurgen Klinsmann wahoze akinira Tottenham na Bayern, yagize ati: “Ndanezerewe cyane kuri Kane kuko abikwiye. Nta wundi mukinnyi wari warakoreye igikombe kuruta we.”
Ni igikombe cya mbere kuri Kane ariko si igikombe cya mbere kuri Bayern. Iyi kipe iyobowe na Vincent Kompany, nawe wari winjiye nk’umutoza mukuru mu 2024, yagaruriye icyizere abakunzi ba Bayern nyuma y’umwaka bari babuze igikombe cya shampiyona.
Ubu ikibazo kigezweho ni: Ese nyuma yo kwirukana umuvumo, Kane ashobora gutwara UEFA Champions League cyangwa igikombe cy’Isi? Igihe nicyo kizabivuga, ariko icyizere ni cyose.
